على رواق 10
🔹"رُخصة ولا فُرصة؟!"
مو كل من خرج إيده من الشباك… سار سواق!
ولا كل وحدة جابت رخصة… تستاهل تسوق!
القيادة ذوق قبل ما تكون مهارة…
واليوم شوارعنا أتحولت لساحة حرب أعصاب،
مو عشان الزحمة…
عشان السلوكيات الخنفشارية اللي تخلي الواحد
يبغى يركب جمل!
▪️ اللي يلف بدون إشارة؟
كأنه يقول: "امسك إيمانك لاتسب؟… أنا
جاي مفاجأة!"
▪️ اللي يدخل بينك وبين السيارة اللي قدامك؟
دا مو مستعجل… دا مريض بنقص الانتباه والاحترام.
▪️ اللي يفتح شباكه يرمي قهوة أو مناديل؟
ما يحتاج نجبلو عسكري… يحتاج تربية من أول
وجديد!
▪️ اللي يسمع أغاني بأعلى صوت في حي سكني
أو عند الإشارة؟
فاكر نفسه DJ وهو في الحقيقة… مؤذي .
---
وبعدين نجي لموضوع الحريم الجدد عالسواقة…
أيوه… في بعضهم نكبة، وورطة ماشية على أربع
كفرات!
▪️ وحدة واقفة عند الإشارة وبتصور !! عشان تنزلها في السناب!
▪️ وحدة ترجع ريوس في المول كأنها تجر مقطورة
سكر!
▪️ وحدة تطلع للدوّار وتدخل من المخرج… وتزعل
تقول: "ما قالولي!"
بس الحق يُقال:
في رجال من سنين يسوقوا… ولسه ما عرفوا الفرق
بين الدركسون والتميسة!
وفي حريم في ظرف أسبوع… سارت تسوق كأنها متخرجة
من مدرسة فورمولا 1 👏
---
الحل؟
نوقف نبرّر، ونبدأ نربّي.
السواقة مو "حرية حركة"… هيا مسؤولية
مجتمع كامل!
ولازم نتفق:
الرخصة مو مجرد تصريح، هي عقد شرف بينك وبين
الطريق.
اللي ما يعرف يسوق بعقل وبفن وذوق وأخلاق…
يقعد في بيتهم، أستر له… ولنا!
مابخرج من البيت الا نادرا وللضرورة . ولما أخرج وأسوق والله على
اعصابي ؟
زي الغنمة اللي نحطها في صندوق ونيت ومانربطها ونسرع بيها
وندخل بيها مطبات ولفات . متخيلين كيف رجولها مشنترة ومعصبة في
الونيت تحاول
تتماسك . أنا زيها ؟؟
—
🖊️ — عصام كوشك
🗓️ الأربعاء 10 يوليو 2025
🗓️ 15محرّم 1447هـ
.jpg)
لو عجبك الموضوع شاركه مع أصدقائك عبر الواتساب
شارك عبر الواتساب
❤️المركاز ما هو موقع وبس… المركاز أنتم أهله وزواره.
اكتب لنا كلمة نعتز بها وشاهدة على مرورك العطر