مركاز عصام بيتكم التاني عالنت

 

 على رواق (13)

 

🔹 الدولة اللي تشبهك

 

سؤال بسيط يتكرر كتير

"فين تنصحني أسافر؟"

وأجاوبه دائمًا بسؤال تاني:

"إنت إيش تبغى من السفر؟"

 

مو كل الدول تنفع لكل الناس، ولا كل الرحلات تنجح بنفس المقاس.

 

في اللي يسافر عشان يتسوق، وفي اللي هدفه يختفي من العالم…

واحد يدور على المتاحف، والتاني يبغى بس كرسي بحر وريحة نسيم.

في اللي يسافر عشان يطبخ وينفخ، وفي اللي يبغى يعيش سلطان زمانه

 مخدوم من إلى .....

---

✈️ طيب… كيف تختار الدولة الصح؟

1. اسأل نفسك: "أنا مسافر ليه؟"

– تبغى ترتاح؟ شوف دول الهدوء

– تبغى مغامرات؟ دور على الطبيعة والأنشطة

– تبغى تسوق؟ خليك قريب من المولات

– تبغى ثقافة وتاريخ؟ المتاحف، الشوارع القديمة، المدن الكلاسيكية

2. الميزانية تحكم!

مو عيب تقول "ما أقدر على دول غالية"،

بس الغلط إنك تحاول تعيش تجربة باريس بميزانية اثيوبيا!

3. الجو والموسم

بعض الدول جميلة… بس  تنقلب تعاسة وقت الأمطار أو الحرّ.

قبل ما تحجز، اسأل:

هل هادي الدولة مناسبة في وقت سفري؟

4. سهولة التنقل والتأشيرة

– هل فيزتها سهلة؟

– هل عندك لغة بسيطة تمشيك؟

– هل مواصلاتها واضحة؟

كلها عوامل تحدد مستوى راحتك هناك.

---

🎒 وأخيرًا: لا تسافر زي غيرك… سافر زيك!؟

 

السفر مو تقليد،

ولا صورة في سناب،

ولا فلوق تقول فيه: "يلا نبدأ جولتنا!" وتلاقي نفسك ورطان

 

سافر عشان ترجع خفيف، فاهم نفسك أكثر، مشحون بطاقة حلوة.

وذكرى جميلة.

لأنه مو كل من ركب طيارة يعتبر سافر ؟

 

عصام كوشك

 الخميس17 يوليو 2025

 22 محرم 1447هـ

 

لو عجبك الموضوع شاركه مع أصدقائك عبر الواتساب

شارك عبر الواتساب

تعديل المقال