مركاز عصام بيتكم التاني عالنت

على رواق (11)

 

🔹"الحنان اللي ما يوصل…"

 

في ناس تحبك… بس ما تعرف تقولها.

تعطيك قلبها، بس بدون كلام.

تحطلك الدنيا تحت رجولك… بس ما تعرف تعبّر غير بالصمت، أو

 بالأفعال اللي تمرّ مرور الكرام.

 

الأب مثلاً… يمكن ماقلك في يوم "أنا فخور بيك"،

بس كل مرة يسأل: "سيارتك فيها بنزين؟" تحتاج شي ناقصك شي ؟ .....الخ

ترى هادي كلها جمل حب.

 

الأم… ما تعرف تقول "أشتقت لك"،

بس تقفل الشبابيك في عزّ الشتا… عشان ما تبرد ويلفحك الهوا.

تغطيك وانت نايم،

وتتضارب معاك الصباح لأنك طلعت من البيت بـ"نص كم".

 

الأخ… يضربك وانت صغير،

بس لو أحد رفع صوته عليك… يسير أسد. عشان يدافع عنك .....

 

في حنان يتكلم،

وفي حنان يتصرف.

 

ومو كل حبّ لازم يكون بـ"كلام حلو"،

أحيانًا أفعالهم تقول: "أنا هنا… وما أقدر أشوفك تتأذى".

لكن للأسف، لما ما نسمع كلام الحنان… نحس إنهم قساة، باردين، أو مشغولين.

 

والحقيقة؟

إنهم بس ما يعرفوا يوصلوا الحنان. بالطريقة اللي إنت تبغاها . !

 

يمكن الوقت فات،

يمكن اللي كان يحبك من بعيد… اختفى.

بس الحنان اللي ما وصلك… لا يعني إنه ما كان موجود.

 

دور عليه… حتلاقيه في دفء البطانية،

في صحن الفول اللي استناك، في الحلى اللي اتعمل مخصوص عشانك

في الإلحاح إنك ترد على الجوال،

وفي دمعة نزلت من طرف عين… واتمسحت بسرعة.

 

خلينا نكون أحنّ… ونعرف كيف نوصل الحنان بكل الطرق الممكنة قبل لا

 يتأخر الوقت.

 

عصام كوشك

🗓 13 يوليو 2025

 18 محرم 1447هـ

لو عجبك الموضوع شاركه مع أصدقائك عبر الواتساب

شارك عبر الواتساب

تعديل المقال