صباح الخير ...... طيب !

مركازعصام

اخر تحديث :

صباح الخير ..... طيب !

كلمة جميلة ومحببة
وتدخل السرور على النفس
لكن في القروبات بالذات
صار من المهم إننا ننتبه لنقطة بسيطة:
كثرة الرسائل الصباحية قد تتحول من لطف إلى إزعاج بدون قصد

فيه فرق بين رسالة خفيفة مرة بين فترة وفترة
وبين نمط يومي متكرر
رسائل كثيرة
استكرات متتابعة
صور ووسائط
وبكذا القروب يتحول من مساحة تواصل وفائدة
إلى سيل إشعارات يرهق البعض

ومن الأشياء اللي يلاحظها كثير
انتشار “النسخ واللصق”
نفس النص ينتقل بين القروبات كما هو
حتى إن بعض الرسائل طويلة جدا
أو فيها أدعية تحتاج فتح “قراءة المزيد”
ومهما كانت النية طيبة
فالبعض ما يستطيع يقرأ
والبعض يكون في دوام
أو نوم
أو عنده ظروف
فالموضوع يصير ضغط غير مقصود

الفكرة ما هي اعتراض على الذكر أو الدعاء
بالعكس… الدعاء خير
لكن الذوق يفرق
والأثر يكون أجمل لما الرسالة تكون:
قصيرة
واضحة
وفي وقت مناسب
وبدون تكرار يومي يرهق الناس

خلونا نراعي إن القروب فيه أعمار مختلفة
وظروف مختلفة
وأجهزة مختلفة
وفيه ناس تحب الهدوء
وفيه ناس تحب تتابع القروب للفائدة فقط
أو داخله ترفه عن نفسها من ضغوط الحياة
وكثرة الرسائل قد تخلي بعض الأعضاء يكتم القروب
وبكذا نخسر الهدف الأساسي من وجوده