مركاز عصام بيتكم التاني عالنت

 بقرة غيرت صحة العالم 

كان ياما كان في قديم الزمان 
الناس كانت تخاف من مرض واحد اكثر من خوفها من الحرب والجوع
مرض اسمه الجدري

مرض ما كان يجي يسبب تعب بسيط وبس
كان يدخل البيوت بلا استئذان
ياخذ ارواح
ويترك وجوه مشوهة
ويزرع الرعب في قلوب الناس

كان يكفي انه يمر على قرية
علشان تصحى بعدها على بكاء وغياب
ولا في علاج
ولا في دواء
ولا في شيء يطمن احد

وسط الخوف هذا ظهر شخص بسيط جدا
مو ملك ولا قائد ولا صاحب منصب
طبيب ريفي هادي اسمه ادوارد جينر

ادورد كان يلاحظ شيء غريب
البنات اللي يشتغلوا في حلب الابقار نادر جدا يجيهم الجدري القاسي اللي يقتل ويشو ه

كان يسأل نفسه
ليش

راقب اكثر
ودقق اكثر
لين اكتشف ان الابقار يجيها مرض خفيف اسمه جدري البقر
والبنات اللي يلمسوا الابقار يتصابوا به اصابة خفيفة
لكن بعدها يصير جسمهم اقوى ضد الجدري البشري الخطير

يعني باختصار
مرض بسيط من بقرة كان يحمي الانسان من مرض قاتل

وقتها جات الفكرة اللي كانت تبدو مجنونة
ايش يصير لو اخذنا من جدري البقر كمية بسيطة وادخلناها في جسم انسان
هل يصير عنده حماية

الناس استغربوا
وبعضهم هاجموا الفكرة
وقالوا كيف تدخل مرض حيوان في انسان

لكن العلم ما يمشي بالمزاج
العلم يمشي بالملاحظة وبالشجاعة

جينر جر ب
وبعد فترة قصيرة ظهرت المفاجاة
اللي اخذ جدري البقر صار محمي من الجدري القاتل

وهنا بدأت لحظة تاريخية
اول لقاح حقيقي في تاريخ البشرية

والاعجب ان كلمة Vaccine جاية من كلمة لاتينية Vacca ومعناها بقرة
لان فكرة التطعيم بدأت من جدري البقر

مرت الايام
وانتشر اللقاح
وتطورت فكرة التطعيم
وصارت اللقاحات تحمي العالم من امراض كانت تقتل بلا رحمة

لين وصل البشر لشيء ما كان احد يتخيله
مرض الجدري انقرض تماما من العالم

مرض كان يقتل الملايين
اختفى

كل هذا بسبب عقل لاحظ
وشجاعة جر بت
وحكاية بقرة صنعت اعظم باب للصحة

الخلاصة
بعض الانجازات الكبيرة ما تبدأ من مختبرات ضخمة
تبدأ من ملاحظة صغيرة
بس تحتاج واحد يشوف بعين غير الناس
ويكمل حتى لو ضحكوا عليه

عصام كوشك 

الأربعاء 14 يناير 2026

تعديل المقال