جنة الكبار
في كروت دعوات الأفراح…
دائما نقرأ
"جنة الأطفال منازلهم"
عبارة بسيطة…
لكن وراها معنى واضح
يعني ما نبغى جنجنة بزارين😄
فكل واحد يحتاج مكان
يرتاح فيه.
وإذا كانت جنة الأطفال
في منازلهم…
اليوم
خلّونا نتكلم عن
جنة الكبار.
فيه لحظة في حياة الإنسان…
يبدأ يلاحظ فيها
إن الأشياء اللي كانت تفرحه زمان…
ما عاد تأثر فيه بنفس الطريقة.
الزحمة تتعبه…
الأصوات تزعجه…
وكثرة الناس
ما صارت تعني له شي.
مو لأنه تغيّر فجأة…
لكن لأنه
صار يفهم نفسه أكثر.
صار يعرف
إيش يريحه…
وإيش يستهلكه.
ومع هذا الفهم…
تتغيّر أشياء كثيرة.
تبدأ تعتذر عن طلعات…
وتختار الهدوء على الضجيج…
وتجلس لحالك…
وأنت مرتاح.
مو لأنك انعزلت…
لكن لأنك
لقيت مكانك.
وهنا تبدأ تفهم معنى
"جنة الكبار"
مو مكان…
ولا رحلة…
ولا مناسبة…
جنة الكبار
حالة.
حالة إنك تصحى
وما في شي ضاغط صدرك.
إنك تخلص يومك
وعقلك مو مزدحم.
إنك تجلس…
وما في أحد ينتظر منك شيء.
ولا كلمة لازم تقولها…
ولا دور لازم تمثله.
جنة الكبار…
إنك ما تحتاج تشرح نفسك.
ولا تثبت نيتك.
ولا تبرر تعبك.
إنك تكون واضح مع نفسك…
حتى لو ما كنت واضح للناس.
ويمكن…
أبسط جنة للكبير…
إنه ما يكون "لازم"
لازم يرد…
لازم يشرح…
لازم يتحمل…
لازم يكون قوي…
وأول ما تسقط كلمة "لازم"…
يبدأ يخف الحمل.
وتبدأ
ترتاح.
يمكن جنة الكبار
ما هي شي كبير…
يمكن هيا لحظة صمت…
كوب قهوة…
طريق فاضي…
أو حتى…
نوم
بدون قلق.
لكن قيمتها…
إنها نادرة.
تجي بصعوبة…
وتروح بسرعة…
بس لو ذقتها مرة…
تبدأ تدور عليها
في كل يوم.
مو عشان تنبسط…
عشان
ترتاح.
وفي النهاية…
يمكن الكبار
ما يحتاجوا مكان جديد…
قد ما يحتاجوا
لحظة صادقة يرجعوا فيها لأنفسهم.
باختصار
جنة الكبار… ملاذهم😍
عصام كوشك
الخميس 16 ابريل 2026
%20(1).jpg)
لو عجبك الموضوع شاركه مع أصدقائك عبر الواتساب
شارك عبر الواتساب
❤️المركاز ما هو موقع وبس… المركاز أنتم أهله وزواره.
اكتب لنا كلمة نعتز بها وشاهدة على مرورك العطر