مركاز عصام بيتكم التاني عالنت

محامي الشيطان المتطوع

في كل قروب وفي كل مجلس وفي كل جمعة عائلية لازم تلقى واحد متطوع من نفسه لوظيفة ما أحد طلبها منه.

وظيفته؟

محامي الشيطان.

مو مهم الموضوع إيش.

المهم إنه يعارض.

إذا قلت الجو حلو قال حر.

وإذا قلت حر قال بالعكس الجو يجنن.

وإذا قلت المشروع ناجح قال استنى شوية.

وإذا فشل قال من زمان وأنا عارف.

يعني  ما عنده مشكلة مع الفكرة نفسها...

عنده مشكلة مع موافقتك عليها.

الغريب إنه ما يجي وقت الشغل.

وقت الشغل يكون مختفي.

لكن أول ما يخلص الموضوع يطلع لك فجأة ومعاه دفتر ملاحظات كأنه كان مراقب الأمم المتحدة.

يقول لك
أنا لو كنت مكانكم كان سويت كدا.

طيب يا حبيبنا... فين كنت قبل أسبوع؟

ليش ما تكلمت وقتها؟

يسكت شوية ويغير الهرجة.

ومن مواهبه العجيبة إنه يقدر يحول أي خبر مفرح إلى نكد عائلي.

تقول له
الحمد لله الأمور اتحسنت.

يقول
اصبر بس وشوف اللي جي

تحس إنه لو قلت له الشمس طلعت من الشرق حيقول لك
ومن قال لك إنها حتطلع بكرة؟

وبرضو من صفاته إنه ما يحب كلمة أحسنت.

الكلمة هادي ثقيلة عليه.

صعبة تخرج من لسانه.

لازم يضيف معاها ملاحظة أو تحفظ أو اعتراض أو تنبيه أو تخويف.

كأنه لو مدح أحد بدون ملاحظات تنسحب منه الرخصة.

والمصيبة الأكبر إنه أحيانا يعترض على اعتراضك على اعتراضه.؟

يعني يدخل في مرحلة متقدمة من الاحتراف.

تقول له
يا أخي انت تعارض كل شي.

يرد عليك
ليش زعلان من الرأي الآخر؟

وهو من ساعة ما دخل رافض آراء البشرية كلها.

لكن خلينا نكون منصفين.

ترى محامي الشيطان المتطوع مو شخص واحد.

ولا هو ساكن في قروب معين.

ولا في مجلس معين.

الحقيقة إن كل واحد فينا مر عليه يوم لعب فيه هالدور.

يمكن في نقاش.

يمكن في اجتماع.

يمكن في قروب واتساب.

الفرق بس إن بعض الناس يسويها مرة وينساها...

وبعضهم آخدها وظيفة بدوام كامل.

عصام كوشك 

الأربعاء 17 ذو الحجة 1447هـ

3يونيو 2026

لو عجبك الموضوع شاركه مع أصدقائك عبر الواتساب

شارك عبر الواتساب

تعديل المقال