قبل لا تقفل الشنطة
إذا كنت حتسافر هالإجازة
اسمحلي أقول لك شي
مو أول شي تحطه في الشنطة هو اللي حيحدد جمال الرحلة
ولا آخر شي تشيله منها
في أشياء لو أخذتها معاك
مهما كان الفندق فخم
والمناظر جميلة
والجو يجنن
حتلاقي نفسك راجع تعبان أكثر مما سافرت
قبل لا تقفل الشنطة
أقفل ملف الزعل
لا تسافر وإنت زعلان من زوجتك
ولا من زوجك
ولا من أولادك
ولا من أخوك
ولا من الدنيا كلها
ترى المشاكل عندها جواز سفر
وتعرف تركب معاك في نفس الرحلة
وفي ناس يغيروا الدولة
لكن ما غيروا المزاج
ويستغربوا ليش الإجازة ما كانت حلوة
وقبل لا تقفل الشنطة
خفف توقعاتك
لا تتوقع إن كل شي حيكون كامل
أتوقع حتتأخر رحلة
وأكيد حيكون فيه زحمة
وأكيد مرة حتضيعوا الطريق
وأكيد أحد حيختار مطعم وما يعجب الباقيين
عادي
هادي هيا الرحلة
مو كل ذكرى حلوة تبدأ بخطة
بعض أجمل الذكريات تبدأ بجملة
يلا خلاص نمشي من هنا
ولا أحد كان مخطط لها
لا تحول السفر إلى سباق
مو لازم تزور كل مكان
ولا تدخل كل مول
ولا تصور كل زاوية
ولا تنشر كل دقيقة
في ناس يرجعوا من السفر
وعندهم ألف صورة
لكن ما عندهم ولا لحظة عاشوها بصدق
استمتع بعينك قبل كاميرتك
واضحك بقلبك قبل ما تضحك للعدسة
ولو كنت مسافر مع العائلة
تذكر
إن الرحلة مو اختبار
ولا منافسة
ولا كل واحد يبغى رأيه يمشي
إذا ضاع الطريق
اضحكوا
إذا تغيرت الخطة
كمّلوا
إذا تأخر الغدا
دردشوا
بعد سنوات
صدقني
ما أحد حيقول
تتذكر الفندق كان خمس نجوم
لكن ممكن يقول
تتذكر لما ضيعنا الطريق
وتتذكر لما جلسنا ساعة نضحك بسبب موقف تافه
هادي هيا الأشياء اللي تعيش
مو فاتورة الفندق
ولا رقم الرحلة
ولا اسم المطعم
وفي شغلة كثير ينسوها
لا تخلي جوالك يسافر أكثر منك
شوف بعينك
اسمع بأذنك
عيش اللحظة
مو كل منظر يحتاج تصوير
بعض المناظر مكانها الطبيعي
يبقى في الذاكرة
مو في ألبوم الصور
وأخيرا
قبل لا تقفل الشنطة
تأكد إنك تركت في البيت
العصبية
والاستعجال
وكثرة الشكوى
وحب السيطرة على كل شي
خذ معاك
ابتسامة
وروح خفيفة
وشوية مرونة
لأن أجمل الهدايا اللي ترجع بها من السفر
مو شنطة جديدة
ولا مشتريات أكثر
ولا صور أكثر
أجمل شي ترجع به
قلب مرتاح
وذكريات تخليك تبتسم
كل ما تذكرت الرحلة
تمنياتي للجميع برحلة سعيدة
عصام كوشك
الأحد 13 محرم 1448هـ
28 يونيو 2026م
%20(1).jpg)
لو عجبك الموضوع شاركه مع أصدقائك عبر الواتساب
شارك عبر الواتساب
يسعدني ويشرفني تعليقك عالموضوع